Presentación

Levo tempo pensando que debemos trazar pontes entre os diferentes niveis do ensino (primaria, secundaria, ciclos formativos, universidades), co fin de compartir as nosas realidades, nutrirnos das nosas experiencias e así,  enriquecer o noso saber, sempre no camiño de desenvolver a nosa Competencia Motriz, esa grande esquecida por todas as leis educativas (aínda que sempre implícita) e tan necesaria no noso quefacer diario. Moitos compañeiros e compañeiras xa compartimos materiais e experiencias a título persoal, por iso nace pontEF no CaMiño, para poder achegar a quen queira, en especial ós centros educativos sostidos con cartos públicos, as nosas vivencias e o noso pouco ou moito coñecemento da materia de Educación Física, tentando abordala dende unha metodoloxía o máis cooperativa posible, onde tentemos dar ó noso alumnado o máis diverso bagaxe motriz e a maior responsabilidade posible dentro da súa aprendizaxe.

Agardo, cos comentarios de toda a comunidade educativa, en especial cos dos meus compañeiros e compañeiras e cos do meu alumnado  e a súas familias, poder mellorar na miña tarefa como profesor e facer a materia máis atractiva.

A primeira colaboración, sen a que este blog non podería ver a luz, foi a de Luís Quinteiro (profesor de EF) que, co seu tempo e o seu saber, deseñou este blog para que, pouco a pouco, poda ir enchendo de contidos. A segunda, a dos compañeiros e compañeiras que xa levan anos permitíndome aprender grazas a fantásticos blogs que hai en internet e que irei referenciando aquí.